नवी दिल्ली - देशाच्या अर्थव्यवस्थेचा लेखाजोखा असणारे केंद्रीय अर्थसंकल्प २०१२-१३ अर्थमंत्री प्रणव मुखर्जी यांनी संसदेत सादर केले. अर्थमंत्र्यांच्या या भाषणाचे महत्वाचे मुद्दे .....
नवी कररचना
> करमुक्त उत्पन्नाची मर्यादा १,८०,००० वरून दोन लाखावर
> दोन लाख ते पाच लाखापर्यंतच्या उत्पन्नावर १० टक्के आयकर
> पाच लाख ते दहा लाखापर्यंतच्या उत्पन्नावर २० टक्के आयकर
> दहा लाखापुढील उत्पन्नावर ३० टक्के आयकर
> बचतीवरील १० हजारापर्यंतचे व्याज करमुक्त
> कॉर्पोरेट टॅक्सच्या रचनेत कोणताही बदल नाही
> सर्व्हिस टॅक्स १० टक्क्यावरून १२ टक्क्यावर
प्रणवदा उवाच ...
> कठोर निर्णय घेण्याची ही वेळ
> विकासाचा दर या आर्थिक वर्षात ७.६ टक्के राहील असा अंदाज
> जागतिक आर्थिक संकटाचा देशाच्या अर्थव्यवस्थेवर परिणाम झाला

> आर्थिक संकटातही भारताचा व्यापारी हिस्सा वाढला आहे
> त्यामुळे विकासाचा वेग वाढविण्याची गरज
> सबसिडीमुळे देशाच्या अर्थव्यवस्थेवर ताण पडतो आहे
> या आर्थिक वर्षात देशातील सबसिडी एकूण उत्पन्नाच्या २ टक्क्याहून कमी राहील
> सरकारी कंपन्यांच्या निर्गुंतवणुकीतून ३०००० कोटी उभारण्याचे ध्येय
> मल्टिब्रॅड एफडीआयसाठी प्रयत्न सुरू राहतील
> पाच प्रथामकिता : वैयक्तिक गुंतवणूक, घरगुती गुंतवणूक, कृषी, ऊर्जा आणि परिवहन
> काळ्या पैशाच्या मुद्द्यावर लक्ष देणार
> रॉकेलवर थेट सबसिडी देण्याचा प्रयत्न होणार
> डायरेक्ट टॅक्स कोडसंदर्भात लवकरच पावले उचलणार
> ऑगस्ट २०१२ मध्ये जीएसटी (गुडस अँड सर्विस टॅक्स लागू होणार)
> राजीव गांधी इक्विटी योजना सुरू होणार
> या योजनेमध्ये पैसे गुंतवणा-यांना ५० टक्के टॅक्स सवलत
> शेअर बाजारात ५० हजार गुंतवणा-यांच्या २५ हजारावर टॅक्स सवलत
> या योजेसाठी तीन वर्षाचा लॉकिंग पिरियड
> पेन्शन बिल, बँकिग बिल याच अधिवेशनात मांडणार
> ६० हजार कोटींचे इन्फ्रास्ट्रक्चर बाँड बाजारात आणणार
> ८८८० किलोमीटर लांबीचे महामार्ग बनवले जातील
> विमान कंपन्या परदेशातून कर्ज घेऊ शकतील
> हवाई इंधनही परदेशातून विकत घेण्यास परवानगी
> स्वस्त घरांसाठी बिल्डरांना परदेशातून कर्जउभारणी करण्यास परवानगी
> १५ लाखांपर्यंतच्या गृहकर्जावर १ टक्क्याची सूट यावर्षीही कायम
> कृषी क्षेत्रासाठी असलेल्या तरतूदीमध्ये यावर्षी १८ टक्क्यांनी वाढ
> एटीएम यंत्रामध्ये किसान कार्ड चालतील अशी व्यवस्था करणार
> नियोजित वेळेत शेतक-यांनी कर्जाची परतफेड केल्यास ३ टक्के सवलत
> सार्वजनिक वितरण व्यवस्थेची नव्याने रचना करणार
> धान्य साठवणुकीसाठी नव्या गोदामांची उभारणी करणार
> आधार कार्डच्या कामासाठी निधीमध्ये वाढ
> काळा पैसा देशात आणण्यासाठी ८२ देशांशी करार
> काळ्या पैश्यावर श्वेतपत्रिका आणणार
> इंदिरा गांधी पेन्शन योजनेमध्ये प्रतिमहिना २०० ते ३०० रुपये मिळणार
> संरक्षणावरील तरतूदीत १,९३,४०७ एवढी वाढ
> देशातील मेडिकल कॉलेजना ' एम्स ' प्रमाणे विकसित करणार
> विद्यार्थ्यांना शैक्षणिक कर्ज देण्यासाठी विशेष निधी
> ६००० नव्या शाळांची योजना
> मागास विभागाच्या विकासासाठी विशेष निधीची तरतूद
> राष्ट्रीय शहरी आरोग्य योजना सुरू करणार
> शाळांमधील दुपारच्या जेवणासाठी ११,९३७ कोटी रुपये
काय महाग, काय स्वस्त
> पेट्रोल महागण्याची शक्यता
> फोन बिल, टीव्ही, एसी, फ्रिज महागणार
> सिमेंट, विदेशी गाड्या महागणार
> हवाई प्रवास, हॉटेलिंग महाग होणार
> सिगरेट, गुटखा, पान मसाला महागणार
> एड्स आणि कर्करोगाची औषधे स्वस्त
> सोने, प्लॅटिनम, हिरे महागणार
> मीठ, सोया उत्पादने, एलसीडी, एलईडी स्वस्त होणार
> मोबाईल महागणार नाहीत
> मोठ्या गाड्या २ टक्क्यांनी महागणार

       न्यूयॉर्क, (९ मार्च) - रिलायन्स उद्योग समुहाचे अध्यक्ष आणि व्यवस्थापकीय संचालक मुकेश अंबानी हे पुन्हा एकदा सर्वांत श्रीमंत भारतीय ठरले आहेत. गेल्या वर्षी त्यांच्या एकूण संपत्तीत ४.७ अब्ज डॉलर्सने घट झाल्यानंतरही त्यांनी भारतातील ४७ अब्जाधिशांवर मात करीत आपले स्थान अढळ ठेवले आहे. फोर्ब्ज या नियतकालिकेने जगातील श्रीमंतांच्या आपल्या वार्षिक यादीत ही माहिती दिली आहे.
    भारतातील ‘टॉप टेन’ अब्जाधिशांमध्ये सावित्री जिंदल आणि त्यांचे कुटुंब (जागतिक क्रमवारी ८०), सुनील मित्तल आणि कुटुंब (११३), कुमार बिर्ला (११६), अनिल अंबानी (११८), दिलीप शांघवी (१२४), शशी आणि रवि रुईया (१३३) आणि कुशाल पाल सिंग (१५३) यांचा समावेश आहे.
    या यादीत केवळ भारतातील अब्जोपतींची संख्या ४८ आहे. विशेष म्हणजे, जागतिक अब्जोपतींच्या यादीतही नऊ अनिवासी भारतीयांचा समावेश आहे. हे अनिवासी भारतीय इंडोनेशिया, आयर्लंड, थायलंड, ब्रिटन आणि अमेरिका यासारख्या देशांमधील आहेत. यामुळे जागतिक अब्जाधिशांच्या यादीत एकूण भारतीयांची संख्या ५७ इतकी आहे, असे फोर्ब्जचा अहवाल सांगतो.
    भारतातील ४८ अब्जाधिशांची एकूण संपत्ती १९४.६ अब्ज डॉलर्स इतकी आहे. या यादीत केवळ दोन भारतीय महिला आहेत. यात १०.९ अब्ज डॉलर्सची संपत्ती असलेल्या जिंदल समुहाच्या सावित्री जिंदल आणि २.२ अब्ज डॉलर्सची संपत्ती असलेल्या मीडिया गु्रप बेनेट कोलेमनच्या अध्यक्षा इंदू जैन यांचा समावेश आहे.
    रिलायन्स उद्योग समुहाचे अध्यक्ष मुकेश अंबानी यांच्याकडे एकूण संपत्ती २२.३ अब्ज डॉलर्स इतकी असून, जागतिक श्रीमंतांच्या यादीत त्यांचा क्रमांक १९ वा आहे. मुकेश अंबानी यांच्या संपत्ती गेल्यावर्षी ४.७ अब्ज डॉलर्सची घट झाली असतानाही त्यांनी भारतातील प्रथम क्रमांकाचे श्रीमंत व्यक्ती म्हणून आपला मान कायम राखला आहे.
    त्यांच्या खालोखाल २०.७ अब्ज डॉलर्सच्या संपत्तीसह मित्तल उद्योग समुहाचे अध्यक्ष लक्ष्मी मित्तल हे जागतिक यादीत २१ व्या क्रमांकावर आहेत. मित्तल यांच्या संपत्तीत गेल्या वर्षी १०.४ अब्ज डॉलर्सची घट झाली होती. गेल्या वर्षीच्या यादीत ३१.१ अब्ज डॉलर्स इतक्या संपत्तीसह मित्तल सातव्या स्थानावर होते. २००४ नंतर प्रथमच मित्तल ‘टॉप टेन’ यादीतून बाहेर पडले आहेत, असेही या अहवालात म्हटले आहे.
    जागतिक श्रीमंतांच्या यादीत अंबानी आणि मित्तल यांच्यासोबत अझिम प्रेमजी, एन. आर. नारायणमूर्ती, वॉरेन बनेल, बिल गेट्‌स यांचाही समावेश आहे. जागतिक श्रीमंतांच्या यादीत फोर्ब्जने एकूण १२२६ धनाढ्यांचा समावेश केेलेला आहे. यात मॅक्सिकोच्या दूरसंचार क्षेत्रातील ७२ वर्षीय कार्लोस स्लिम यांनी ६९ अब्ज डॉलर्सच्या संपत्तीसह पहिला क्रमांक पटकावला आहे.

 न्यूयॉर्क - तोट्यातील सीटी ग्रूप नफ्यात आल्यावर मुख्य कार्यकारी अधिकारी विक्रम पंडित यांनी पुन्हा भरघोस पगार घेण्यास सुरवात केली असल्याची वार्ता आहे. २०१० मध्ये त्यांनी केवळ एक अमेरिकी डॉलर पगार घेऊन बोनस नाकारले होते. २०११ मध्ये त्यांचा पगार एक कोटी ४.८६ लाख अमेरिकन डॉलर होता. सिक्युरिटी अँड एक्स्चेंज समितीला प्राप्त माहितीनुसार २०११ यावर्षी विक्रम पंडित यांना १७ लाख अमेरिकन डॉलर इतका पगार मिळाला असून ५३ लाख अमेरिकन डॉलर बोनस व ७८ लाख अमेरिकन डॉलर इतर भत्ते मिळाले आहेत. २००८ मध्ये तोट्यात आलेली बँक नफ्यात आल्यावरच विक्रम पंडित यांनी पगार घेण्यास सुरवात केली आहे. बँकेच्या उत्पन्नात वाढ झाली असली तरी शेअर्सच्या भावात ४४ टक्क्यांनी घट नोंदविण्यात आली आहे.

मुंबई, (९ मार्च) - महागाईचा दर कमी झाल्यानंतर आर्थिक स्थिती आणखी सुलभ करण्याच्या दिशेने प्रथमच पाऊल उचलताना, भारतीय रिझर्व्ह बँकेने आज आपल्या कॅश रिझर्व्ह रेशो (सीआरआर)च्या दरात ०.७५ टक्क्यांनी कपात केली. या निर्णयामुळे ठेवीदार बँकाना रिझर्व्ह बँकेकडे ०.७५ टक्के इतका निधी जमा करणे आवश्यक राहणार असून, यामुळे अर्थव्यवस्थेत ४८ हजार कोटी रुपयांचा प्रवाह येणार आहे.
    आतापर्यंत ५.५ टक्के असा आरआरआरचा दर होता. तो आता ४.७५ टक्के इतका करण्यात आला आहे. हा निर्णय बँकींग व्यवस्थेत ४८ हजार कोटी रुपये आणण्यासाठी सहाय्यक ठरणार आहे, असे रिझर्व्ह बँकेने जारी केेलेल्या निवेदनात म्हटले आहे.
    सीआरआरमध्ये कपात करण्याचा हा निर्णय उद्या शनिवारपासून अंमलात आणण्यात येणार आहे. आर्थिक तूट करण्यासाठी हा निर्णय उपयुक्त ठरणार आहे. अग्रीम करामुळे मार्चच्या दुसर्‍या आठवड्यात आर्थिक तुटीचा आकडा वाढण्याची शक्यता लक्षात घेऊन हा निर्णय घेण्यात आला, असे निवेदनात म्हटले आहे. अग्रीम कर जमा करण्याची अंतिम तारीख १५ मार्च आहे.
    यापूर्वी, २४ जानेवारी रोजी बँकेने आपल्या सीआरआरच्या दरात ०.५ टक्क्याने कपात केली होती. या निर्णयामुळे अर्थव्यवस्थेत ३२ हजार कोटींचा निधी आला होता. आता यात आणखी ४८ हजार कोटी रुपयांची भर पडणार असल्याने रिझर्व्ह बँकेने अवघ्या तीन महिन्यात ८० हजार कोटी रुपये अर्थव्यवस्थेत आणले आहेत.

मुंबई, (९ मार्च) - जागतिक बाजारात आलेल्या स्थिरततेमुळे स्थानिक बाजारात गुंतवणूकदार आणि व्यापार्‍यांनी खरेदीवर भर दिल्याने आणि उद्योगांकडूनही उचल वाढल्याने मुंबईच्या सराफा बाजारात आज सोने व चांदी या दोन्ही धातूंच्या किमतीत वाढ झाली.
    स्टॅण्डर्ड सोन्याच्या प्रतितोळा भावात ८० रुपयांची वाढ झाली. बुधवारी २७,६८० रुपये असलेला हा भाव आज २७,७६० रुपयांवर स्थिरावला. त्याचप्रमाणे, शुद्ध सोन्याच्या किमतीत ८५ रुपयांची वाढ झाल्याने, हा भाव बुधवारच्या २७,८०५ रुपयांवरून आज २७,८९० रुपयांवर बंद झाला.
    चांदीच्या प्रति किलो किमतीतही ६५० रुपयांनी वाढ झाली. बुधवारी चांदीचा भाव ५७,५२० रुपये इतका होता. आज तो ५८,१७० रुपयांवर स्थिरावला.
    दिल्लीच्या सराफा बाजारात मात्र, सोन्याच्या किमतीत २५ रुपयांची घसरण झाल्याने येथे हा भाव २८,१२६५ रुपयांपर्यंत खाली आला. तथापि, चांदीच्या प्रति किलो भावात २०० रुपयांची वाढ होऊन तो ५८ हजार रुपयांवर स्थिरावला.

मुंबई, (६ मार्च) - पाच राज्यांमधील विधानसभा निवडणुकीत केंद्रातील सत्तारूढ कॉंग्रेस पक्षांची चांगलीच वाताहत झाल्याने, हा पक्ष आर्थिक विकासाला खरंच गती देऊ शकेल काय, या चिंतेने मुंबईच्या शेअर बाजाराला ग्रासले आणि गुंतवणूकदारांनी केवळ नफा कमविण्यावरच भर दिला. याची परिणती शेअर बाजाराच्या निर्देशांकात १९० अंकांची घसरण होण्यात झाली.
    ३० कंपन्यांवर आधारित मुंबई शेअर बाजाराचा निर्देशांक एकीकडे निकाल जाहीर होत असताना १७,६९१.९६ अंकापर्यंत  वर आणि १७,१२८.२८ अंकांपर्यंत खाली आला होता. अखेर मणिपूर वगळता इतर चारही राज्यांमध्ये कॉंग्रेसची वाताहत झाल्याच्या वृत्तावर शिक्कामोर्तब झाले आणि शेअर बाजारात १८९.५८ अंकांची घसरण होऊन तो १७,१७३.२९ अंकांवर बंद झाला.
    त्याचप्रमाणे, राष्ट्रीय शेअर बाजाराचे प्रतिनिधित्व करणार्‍या निफ्टी निर्देशांकातही ५७.९५ अंकांची घसरण झाली. दिवसभराच्या उलाढालीत त्याने ५३८२.०५ असा उच्चांक गाठल्यानंतर बाजार बंद होतेवेळी तो ५२२२.४० अंकांवर स्थिरावला.

२,६५0 कोटींचा जग्वार लँडरोव्हर प्रकल्प उभारणार

नवी दिल्ली। दि. १९ - औद्योगिक जगतात टाटा मोटर्स आपला ठसा आणखी ठसठशीत करण्याच्या तयारीत असून, लवकर ब्रिटनमध्ये जग्वार लँडरोव्हरचा एक नवीन प्रकल्प उभारणार आहे. यासाठी ३५.५ कोटी पौंडची (जवळपास २,६५0 कोटी रुपये) गुंतवणूक केली जाणार आहे.

टाटा मोटर्सने २00८मध्ये ब्रिटनच्या जग्वार लँडरोव्हरची मालकी घेतली होती. कंपनीने जारी केलेल्या निवेदनात म्हटले आहे की, ब्रिटिश सरकारशी झालेल्या वाटाघाटीअंती जग्वार लँडरोव्हर प्रगत तंत्रज्ञानाचा वापर करून कमी उत्सर्जन करणार्‍या इंजीनच्या उत्पादनासाठी मध्य ब्रिटनमधील स्टॅडफोर्डशायर येथे प्रकल्प उभारणार आहे. या प्रकल्पात चार सिलिंडरच्या जेएलआर पेट्रोल आणि डिझेलआधारित इंजीनचे उत्पादन केले जाईल.

या प्रकल्पामुळे दोन हजार लोकांना रोजगार मिळेल. या वर्षी टाटा मोटर्सच्या जागतिक विक्रीत ३ टक्के वाढ झाली असून, जग्वार लँडरोव्हरच्या विक्रीत ३१ टक्के वाढ झाली आहे. जेएलआर भारतातही एक इंजीन प्रकल्प स्थापन करण्याचा विचार करीत आहे.

जग्वार लँडरोव्हरचे मुख्य कार्यकारी अधिकारी राल्फ स्पेथ यांनी सांगितले की, व्यवसायासंदर्भातील जेएलआरच्या धोरणान्वये आम्ही प्रगत इंजीनचे डिझाईन तयार करून त्याचे उत्पादन करणार आहोत. या प्रकल्पाची उत्पादन क्षमता आणि हा प्रकल्प कधी पूर्ण होईल, याबाबत त्यांनी काहीही स्पष्ट केले नाही.

स्रोत: तरुण भारत

मुंबई, ३० सप्टेंबर - देशात खाद्यान्न महागाईचा दर वाढल्याने रिझर्व्ह बँक पुन्हा व्याजदरात वाढ तर करणार नाही ना, या चिंतेने आज मुंबई शेअर बाजारातील निर्देशांक तब्बल २४४ अंकांनी खाली आला. जागतिक बाजारातील मंदीचाही हा परिणाम असल्याचे सांगितले जात आहे. कालच्या सत्रात निर्देशांकाने २५२ अंकांची कमाई केली होती. आज तो २४४.३१ अंकांनी खाली आला आणि १६,४५३.७६ वर स्थिरावला. या घसरणीमुळे निर्देशांकाची जुलै ते सप्टेंबर या तिमाहीतील घसरण ९.६ टक्क्यांवर पोहोचली आहे. गेल्या तीन वर्षातील ही विक्रमी घसरण मानली जात आहे. १७ सप्टेंबर रोजी संपलेल्या आठवड्यात खाद्यान्न महागाईचा दर वाढल्याने बाजाराला पुन्हा व्याजदरवाढीची चिंता सतावू लागली आहे. खुद्द अर्थमंत्री प्रणव मुखर्जी यांनीही चिंता व्यक्त केल्याने गुंतवणूकदारांनी आपला हात आखडता घेतला. नॅशनल स्टॉक एक्सचेंजच्या निफ्टीतही आज ७२.२० अंकांची घसरण झाली. तो ४९४३.२५ वर बंद झाला. धातू, रिऍलिटी, बँक या क्षेत्रातील शेअर्स आज सर्वाधिक तोट्यात होते. बाजारातील दुसर्‍या क्रमांकाची मोठी कंपनी इन्फोसिसचे शेअर्स आज ०.६४ टक्क्याने खाली आले. टाटा कन्सल्टन्सी, विप्रो या सॉफ्टवेअर निर्यात क्षेत्रातील शेअर्सही आज घसरले होते. जागतिक बाजारातील मंदीमुळे या कंपन्यांना फटका बसला. टूजी स्पेक्ट्रम घोटाळ्यात अनिल अंबानी यांचे नाव संशयितांमध्ये आल्याने त्यांच्या समूहातील कंपन्यांनाही बरेच नुकसान सहन करावे लागले. आज धातू क्षेत्रातील शेअर्स सर्वाधिक तोट्यात राहिले. त्यापाठोपाठ रिऍलिटी, बँक आणि ऑटो क्षेत्राचा क्रमांक लागतो.