बारामतीचा प्रस्ताव बारगळला; सांगलीला पसंती

मुंबई, - अखिल भारतीय नाटय़ परिषदेतर्फे घेण्यात येणारे ९२ वे अ. भा. मराठी नाटय़ संमेलन २० ते २३ जानेवारी दरम्यान सांगलीत घेण्याचे निश्चित करण्यात आले असून २३ वर्षांनंतर सांगलीला नाटय़ संमेलन आयोजित करण्याचा मान मिळाला आहे. नाटय़ परिषदेच्या नियामक मंडळाच्या कार्यकारिणीची बैठक आज मुंबईत झाली. या बैठकीत ९२ व्या अखिल भारतीय मराठी नाटय़ संमेलन आयोजित करण्यासाठी आलेल्या विविध प्रस्तावांवर चर्चा करण्यात आली. उपमुख्यमंत्री अजित पवार बारामतीसाठी, जलसंपदामंत्री सुनील तटकरे रोह्य़ासाठी तर, सांगलीसाठी खासदार प्रतीक पाटील हे  नेते नाटय़ संमेलनासाठी आग्रही होते. अजित पवार यांनी तर गेल्या वर्षीच बारामतीमध्ये नाटय़ संमेलन आयोजित करण्यासाठी आग्रह धरला होता. मात्र, त्यावेळी ते होऊ शकले नाही. त्यामुळे यावेळी तरी बारामतीला संधी मिळणार, असे त्यांना वाटले होते. सांगलीत २००८ मध्ये अ.भा. मराठी साहित्य संमेलन झाल्यानंतर नाटय़ संमेलनासाठी खासदार प्रतीक पाटील यांनी प्रयत्न केले आणि त्यांच्या प्रयत्नाला आज यशही आले. सांगलीत यापूर्वी १९२४ ला बाबासाहेब घोरपडे यांच्या अध्यक्षतेखाली, १९४३ मध्ये ना. वि. कुळकर्णी यांच्या अध्यक्षतेखाली आणि १९८८ मध्ये ज्येष्ठ नाटय़ कलावंत राजाराम शिंदे यांच्या अध्यक्षतेखाली नाटय़ संमेलन घेण्यात आले होते.  सांगलीतील या नाटय़ संमेलनाच्या अध्यक्षपदी कोण असणार, याबाबत चर्चा सुरू झाली असून त्यासाठी ज्येष्ठ नाटय़ दिग्दर्शक जब्बार पटेल, अमोल पालेकर, विक्रम गोखले आणि फैय्याज यांची नावे चर्चेत असल्याची माहिती सूत्रांनी दिली.